|
د افغانستان د مدني ټولنې د
مجتمع د مدني روزنې څانګې د اسد د میاشتی په
پنځلسمه چې د عیسوي کال د اګست د میاشتی له
څلورمې سره سمون لري د ښوونکو د روزلو یو اووه
ورځنې ورکشاپ یا ښوونیزه دوره د ولایاتو څخه
د روزنکو د روزنې په موخه ترسره کړ.
دا ښوونیزه دوره د مدني روزنی
دوهمه دوره ده چې د لومړنې لس میاشتنې دورې نه
وروسته د افغانستان د مدني ټولنې د مجتمع لخوا
په مخ بیول کیږي. دا ولایتی روزونکي د ښوونیزې
دورې وروسته په خپلو ځانګړو ولایتونو کې د
مدني ټولنې اړوند مضامینو په اړوند د پوهاوي
ښوونیزې دورې په لار اچوي او په لرو پرتو سیمو
کې خلک دموکراتیکو نوښتونو څخه خبروي.
انجینر عزیزالرحمن رفیعي په
خپلې پیلامه وینا کې د ښوونکو څخه وغوښتل چې
دوی ته یوه ډیره لوېه معنوي دنده ورسپارل شوی
ده، او ځکه باید دوی دا معنوي دنده د
افغانستان د ټولنیز ژوند د تغییر لپاره په
غاړه واخلي« کله چې په افغانستان کې نور هیڅ
څوک تغییر نشي راوستې، نه امریکایان ، نه
نړیواله ټولنه، نو ځکه دا یوازې افغانان دي چې
باید خپل لستوڼي را بډوهي او په افغانستان کې
د تغییر راوستو لپاره له هیڅ ډول هڅې څخه
سرغړونه ونه کړي او په ورین تندي دې مقدسې
دندې ته غاړه کیږدي.»
ښوونیزه دوره د افغانستان د
مدني روزنې د څانګې د سر ښوونکۍ اغلی فوزیه
صمیمي لخوا پر مخ بیول کیږي. دا ولایتي
روزونکي به د ښوونیزې دورې نه وروسته په ځینو
ولایتونو لکه: د پکتیا ولایت کې ، په لغمان کې
، په فاریاب ، بدخشان ، په سمنګانو کې او په
بامیانو کې خپل د پوهاوي ښوونیزې دورې په لار
واچوي، دا دورې په پام کې دي چې د مدني روزنې
په ډیرو مهمو موضوعاتو خلکو ته معلومات ورکړي،
چې په هغه کې د ښځو حقونه، اساسي قانون ، ملی
شورا ، دموکراسي ، د ښارمن حقونه او داسې نور
مهم او اړینې موضوعګانې شاملې د.
د افغانستان د مدني روزنې
څانګې په مخکینیو ښوونیزو دورو کې څلور
ولایتونه په پام کې نیولي وو، په ټولیزه توګه
یې په دغو ولایتونو کې تر ۲۰۰۰ تنو پورې وروزل
او د مدني ښوونو په کورنۍ کې یې یوځای کړل، په
دې دوره کې چې شپږ ولایتونه په نظر کې نیول
شوي دي نو د مدني روزنې څانګه غواړي تر دې ډیر
پوه خلک په سیمه ایزه کچه وروزي ، ځکه چې متل
دی « په یو ګل سپرلې نه راځي» .
« مونږ به په ډیره خوشالی دا
ډیره درنه او په عین حال کې مهمه دنده په خپل
ولایت
ګردیز کې په مخ بوځو، د پکتیا
د ولایت ګردیز په ښار کې داسې روزنو ته ډیره
سخته اړتیا لیدل کېږي » خوشحال غفوري د پکتیا
د ولایت ښوونکي په خپلو څرګندونو کې وویل.
دا افغانستان د مدني ټولنې د
مجتمع د مدني روزنې څانګې د خپلو نشراتي
چینلونو څخه لکه: مجله ، ویب پاڼه او کتابونو
له لارې غوښتي د پوهاوي دغه بهیر لا ګړندی کړي
تر څو زمونږ دغه د خزان په اور لمبه هیواد ،
چې په هره برخه کې ډیر کار او هڅو ته اړتیا
لري ، د سپرلي په ګلونو ښکلی کړي.
د ښاغلي رفیعی په وینا دا
بدلون؛ ټینګې ژمنې ، پخې ارادې او متین عزم ته
اړتیا لري. |
